النصائح الذهبية لمناعة طفل قوية
النصائح الذهبية لمناعة طفل قوية
💥مفيش موضوع اهم عند اي ام و اب من مناعة طفلهم .
👈يوميا بتسال السؤال ده اكتر من 10 مرات : ازي مناعة ابني يا دكتور ؟ و ارفعها ازاي ؟
👀موضوع المناعة ده من اصعب الامور جدا خصوصا ان الاهتمام بيها بيبدا من لحظة الولادة و ده اللي ناس كتير مش واخده بالها منه .
🔥عشان كده جمعت اغلب النصايح الخاصة للمناعة و قسمتها ع جزئين .. الاول خاص بمناعة الاطفال حديثي الولادة و التاني خاص بمناعة الاطفال الكبار
✍️كلنا عايزين ولادنا ميتعبوش و عشان كده اقري النصايح دي و حاولي تعمليها ع قد ما تقدري
👇ازاي احافظ ع مناعة طفلي حديث الولادة ؟
1️⃣مناعة طفلك بتتبني من اول لحظة ميلاده .. متستهونيش بلبن السرسوب ده بيرفع المناعة جدا فركزي عليه في اول 3 ايام من عمر الطفل .
2️⃣ المعروف ان الرضاعة الطبيعية بترفع المناعة جدا و دي حقيقة . بس مش معنى كده ان اللي بيرضع صناعي منعرفش نساعده .
نوع اللبن الصناعي و جودته بتفرق كتير . فيه البان بتبقى جودتها عالية و كمان عليها مواد ترفع المناعة و دي انصحك بيها جدا ولكن طبعا علي حسب الحالة المادية اما الالبان المدعمة فدي في اضيق الحدود وحسب القدرة المادية .
3️⃣الطفل حديث الولادة عامل زي المغناطيس بيشد اي تعب ليه بسهولة . حرصي ع طفلك و خلي بالك من الناس حواليه لو حد تعبان اعزليه عنه و حطي عينك ف وسط راسك في اوقات الزحمة دي السبوع و الاعياد و المناسبات .
4️⃣ لو انتي اللي تعبانة البسي ماسك طبي هتلاقيه ف كل الصيدليات بسهولة عشان متعديهوش
5️⃣ صحة طفلك مش هزار . متتكسفيش تمنعيه ع اي حد تعبان زي جده جدته عمه خالته اخواته والده .. لو تعب مناعته هتتدمر و هيتعب كتير بعدين .
6️⃣ التطعيمات حاجه ضرورية جدا بس كتير مش عارفين ان فيه تطعيمات اضافية كتيرة مش بياخدها الطفل في الصحة . اسالي عن جداول التطعيم الاضافية و طعمي طفلك كل التطعيمات عشان تحميه بشكل كبير من اي خطر في المستقبل .
👀في امريكا و الدول الاوربية الاطفال بيطعموا ضد انواع كتيرة من الجراثيم و ده بيخلي مناعتهم تبقى قوية جدا للدرجة اللي الطفل ع سن سنة و نص مش بياخد اي مضاد حيوي الا ما ندر .
👈ياريت اطفالنا يبقوا كده و احسن .
🔥التطعيمات الاضافية زيها زي الدورية بتبدا م سن 2 و 4 و 6 شهور و سنة و سنة و نص .
💥وبتحمي طفلك م امراض كتير مهمة و منتشرة زي النزلات المعوية ( الروتا) و الالتهابات الصدرية و الجديري المائي و الالتهاب السحائي و خلافهم فضروري تطعميه لو تقدري .
7️⃣الاكل بدري بيتعب طفلك . اكلنا مليان بجراثيم كتيرة بتضغط ع جهاز مناعة الطفل . حاولي متدخليش الاكل قبل سن 6 شهور عشان تحافظي ع مناعته و ميتعبش بسرعة منه.
8️⃣انواع الاكل اللي بتدخليها لطفلك مهمة . ياريت تاجلي منتجات الالبان و متدخليش الالبان قبل سن سنة .
9️⃣ حساسية الالبان من المواضيع المهمة جدا و بتظهر من سن صغيرة و بتبقى موجودة في الرضاعة الطبيعي و الصناعي و المختلطة لكن مع الرضاعة الطبيعية المطلقة بتكون اقل بكتير من الصناعي . فياريت لو شكيتي فيها اكشفي ع دكتور كويس عشان الحساسية دي بتضغط دايما ع مناعة طفلك و بتجهدها طول الوقت .
🔟 حساسية الانف موضوع منتشر جدا اليومين دول . وجودها برضو بيمثل ضغط ع مناعة طفلك ده غير انها بتعتبر مركز لانتشار الجراثيم داخل جسم طفلك و مصدر اساسي لتكرار التعب عليه في وقت قصير . لو شكيتي ان عنده حساسية انف اكشفي عليه متتاخريش .
🔥لو طفلك تعب لا قدر الله ياريت تطلبي من دكتورك ياجل دخول المضاد الحيوي . ولو ضروري يبقى الشراب اكتر امان من الحقن . المضادات الحيوية بصفة عامة بتدمر المناعة خصوصا الحقن .
👀 الحقي طفلك في التعب بدري و متستنيش تجربي ادوية عليه . التعب لو لحقناه بدري العلاج اللي هياخده هيبقى اخف بكتير من لو استنيتي عليه .
👈بلاش تكرري الروشتة القديمة . مش كل تعب بيبقى بنفس الميكروب او بنفس الدرجة او محتاج نفس العلاج . العلاج الغلط بيدمر المناعة مش بيفيدها .
💥 مع احترامي لاخواتي الصيادلة لو طفلك تعبان متكشفيش عند صيدلي و تخليه يديلك دوا . عادة ده مش بيفيد طفلك و حالته بتسوء ده غير ان الادوية اللي بياخدها بتدمر المناعة .. فخلي بالك .
👀لو طفلك تعب فجأة بالليل في وقت مفيش دكاترة فيه روحي لاقرب طوارئ مستشفي هيديلك حاجه تهدي الدنيا شوية . متستنيش بقى يومين تلاتة و بعدها تكشفي .
👈 متخليش الصيدلي يديكي مضاد حيوي . متروحيش تشتري م نفسك مضاد حيوي . بلاش مضادات حيوية خالص الا بامر الطبيب و ياريت عند الضرورة القصوي .
🔥 مفيش حاجه اسمها ابني مبيخفش من غير مضاد حيوي حقن . فيه حاجه اسمها مناعة ابني متدمرة و انا بالحقن دي بدمرها اكثر .
استشارى اطفال وحديثي الولاده
العنوان🏠 : 4 مكرر امتداد عباس العقاد – بجوار مكتب مصر للطيران أمام وندرلاند والحديقة الدولية
المواعيد 🕐: السبت والأثنين والأربعاء من الساعه 6 مساء
للحجز والاستفسار📞 : 01110482121
العنوان 🏠: عمارة ١ بلوك 10- شارع رقم 9 - مدينة الواحة الحي العاشر - مدينة نصر
المواعيد : الاحد والثلاثاء والخميس من الساعه 6:30 مساءً
للحجز والاستفسار 📞: 01278030477
.